Azərbaycan millisinin baş məşqçisi Ayxan Abbasov DÇ-2026-nın seçmə mərhələsində Fransaya uduzduqları oyundan sonra fikirlərini bölüşdü.
Futbolpress.az Parisdən xəbər verir ki, mütəxəssis 0:3 hesabıyla bitən matçldan sonra bunları dedi:
– Oyunun çətin keçəcəyini bilirdik. Rəqibin necə ciddi hazırlaşdığını gördük. Azarkeş dəstəyi, ilk dəqiqələrdən rəqibin pressinqi, bunları bilirdik. Fasiləyə bir dəqiqə qalmış qol buraxdıq. Dözə bilsəydik, ikinci hissə daha çox üzərimizə gələcəkdi. Rəqibin gücü bəllidir. Futbolçularım əzmkar oynadı. Əzm, istək olandan sonra gələcəkdə daha yaxşı olacaq. Futbolçulara bugünkü oyunda göstərdiyi əzmkarlığa görə təşəkkür edirəm. Üç gündən sonra daha çətin oyun olacaq.
– Mahir Emrelinin oyununu necə şərh edərdiniz?
– Mahir mənə görə, son vaxtlarda ən yaxşı oyunlardan birini keçirdi. Əzmkar idi. Hücumların alınmaması rəqibə görə idi. Mahir tək qalanda çətinlik çəkirdi. Pis təsir bağışlamadı. Ona dəstək olmalıyıq. Hücum xəttindəki oyunçularımız az oynayır. Gələn oyunda rotasiyalar olacaq.
– Bugünkü oyunda çox güc itirdiniz. Buraxılan qollar və itirilən güc üç gündən sonrakı oyunda komandaya mane ola bilər?
– Yox. Oyunlar arasında vaxt azdır və fiziki çətinlik ola bilər. Heyətimiz genişdir. Qarşıda iki gün vaxtımız var, çalışacağıq, bərpa olaq. Çətinlik olsa, dəyişiklik edəcəyik. Milli komandada qısa müddətdə oynamağa məcburuq. Futbolçular buna öyrəşməlidir. Rəqibimiz Ukrayna da ağır səfərdən gələcək. Futbolçularla danışacağıq. İkinci qolda daha diqqətli ola bilərdik. Bəlkə, hesab daha böyük olmaya bilərdi. Səhvlərdən nəticə çıxaracağıq.
– Fasiləyə 0:0 yollansaydıq və ikinci hissə bəxt bizdən yana olsaydı, sensasiya edə bilərdik?
– O qolu ancaq Mbappe kimi biri vura bilərdi. Futbolçular onun qarşısını almağa çalışdı, amma olmadı. Fasiləyə 0:0 yollansaydıq, ikinci hissə nisbətən daha asan keçə bilərdi. Komanda inanırdı ki, mübarizə apara bilərik.
– İkinci hissədə Mahirin meydanda qalması məcburiyyətdən atılmış addım idi?
– Rüstəm Əhmədzadə əvəzetmə istədi. Həmin dəqiqə iki oyunçunu çıxarmaq istəmədik. Mahirdən cinahlarda istifadə edə bilirik. Toral da elə oyunçudur. İstədiyimiz dəqiqəni saxlaya bilmədik. Standart vəziyyətlərdə çətinlik çəkirdik. Qol olmazdan öncə dəyişiklik etməyi düşünürdük. Hücumlara hazırlaşmışdıq. İslandiya və Ukrayna ilə oyunda onları izləmişdik və bu cür hücumlar etmişdilər. 90 dəqiqə hücumun qarşısını almaq olmur.
– Oyunun ən yaxşılarından biri Xaybullayev idi. İndi durumu necədir?
– Bu gün ən yaxşılardan idi. Sevinirəm ki, əsas heyətdə yerini yavaş-yavaş qazanır. Yoruldu, ikinci qolda daha sadə oynayıb hücuma çıxmalı idik. Rəqibin ortada çox pressinq etdiyini bilirdik. Təcrübə qazandıqca daha yaxşı olacaq. İstəyi var, əzmkardır. Durumu normaldır, iki günə bərpa olacaq.
– Santuşun dövründəki oyunla indiki arasında fərq var. Futbolçular eynidir, amma… Əvvəlki oyunlarda sistemsizlik var idi. Çünki oynayan eyni futbolçulardır, ancaq bu gün meydanda bir sistem görünür. Əsas problemimiz sistemsizlik idi?
– Əvvəlkidən danışmaq çətin olar, düzgün deyil. Millidə olmayanda da belə suallar verilirdi. Tək əsas yox, digər komandalarımızın da bir səviyyəyə çatdırmaq istəyiriksə, bir sistem olmalıdır. Rəhbərliklə danışmışıq, yəqin, alınar. Səmimi fikrimdir, heyətdə böyük potensialı olan oyunçular var.
“FutbolPress”, Paris