Təbrizin “Traktor” klubunun keçmiş futbolçusu Mojtaba Torşiz İranda davam edən etirazlar zamanı həyat yoldaşı ilə birlikdə öldürülüb.
Komanda.az xarici KİV-ə istinadən xəbər verir ki, bu barədə sosial şəbəkələrdə paylaşım edilib.
Bildirilib ki, Mojtaba Torşiz və həyat yoldaşı etiraz aksiyalarında İran xalqını dəstəklədiklərinə görə İslam Respublikası təhlükəsizlik qüvvələri tərəfindən qətlə yetirilib. Hadisənin təfərrüatı ilə bağlı rəsmi qurumlar tərəfindən hələlik açıqlama verilməyib.
47 yaşlı Mojtaba Torşiz 2009-2011-ci illərdə klubda yarımmüdafiəçi mövqeyində çıxış edib. O, 2016-cı ildə futbolçu karyerasını bitirib.
Ötən il dekabrın 28-də İranın milli valyutasının kəskin dəyər itirməsi və iqtisadi problemlər səbəbindən Tehranın Böyük Bazarı ərazisində başlayan etiraz aksiyaları ölkənin bir çox şəhərinə yayılıb.
Son hesabatlara görə, etirazlar zamanı ölənlərin sayı 147 təhlükəsizlik əməkdaşı və 2 403 etirazçı olmaqla, ümumilikdə 2 550 nəfərə çatıb.
İran hakimiyyəti ölən və yaralananlarla bağlı hələlik rəsmi açıqlama yaymayıb.